CM Fadnavis : मराठवाड्यातील पूरस्थितीचा आढावा घेतल्यानंतर मुख्यमंत्र्यांनी दिले थेट निर्देश, म्हणाले…

मुख्यमंत्री देवेंद्र फडणवीस यांनी मराठवाड्यातील पूरस्थितीचा सखोल आढावा घेतला. पूरग्रस्तांना तातडीने मदत पोहोचवण्यासाठी त्यांनी अनेक महत्त्वपूर्ण घोषणा केल्या. पूरबाधित भागातील नागरिकांना सुरक्षित स्थळी हलवण्यात आले असून, निवारा शिबिरांमध्ये भोजन आणि पिण्याच्या पाण्याची उत्तम सोय करण्याच्या सूचना जिल्हाधिकाऱ्यांना देण्यात आल्या आहेत.

जनावरांच्या चाऱ्याचा प्रश्न गंभीर असल्याने, तात्काळ चारा उपलब्ध करून देण्याचे निर्देशही मुख्यमंत्र्यांनी दिले. राज्य सरकारने पूरग्रस्तांसाठी यापूर्वीच २००० कोटी रुपये वितरित करण्यास सुरुवात केली आहे. ज्या घरांमध्ये पाणी शिरले आहे, त्यांना १०,००० रुपयांची तात्काळ मदत दिली जात आहे. तसेच, लोकांना राशन किट्स आणि अन्नधान्य वाटपाचे कामही सुरू झाले आहे.

मुख्यमंत्री फडणवीस यांनी जिल्हाधिकाऱ्यांना प्रत्यक्ष फिल्डवर उपस्थित राहून मदत कार्यावर लक्ष ठेवण्यास सांगितले आहे. पुढील दोन ते तीन दिवस सतर्क राहून कोणतीही हानी होणार नाही याची काळजी घेण्याचे आवाहनही त्यांनी केले. सरकार पूरग्रस्तांना जास्तीत जास्त मदत करण्यास कटिबद्ध असल्याचे मुख्यमंत्र्यांनी यावेळी स्पष्ट केले.