Pune News | कोंढव्याला पाकिस्तान संबोधल्याप्रकरणी भाजप पदाधिकाऱ्यावर गुन्हा दाखल, व्हिडिओ व्हायरल होताच….

पुण्यातील कोंढवा परिसरासंदर्भात वादग्रस्त वक्तव्य केल्याप्रकरणी एका भाजप पदाधिकाऱ्याविरोधात गुन्हा दाखल करण्यात आला आहे. संबंधित पदाधिकाऱ्याने कोंढव्याला “पाकिस्तान” तसेच “कराची” अशी उपमा दिल्याचा व्हिडिओ सोशल मीडियावर व्हायरल झाल्यानंतर हा वाद उफाळून आला. या पार्श्वभूमीवर कोंढवा पोलीस ठाण्यात तक्रार दाखल करण्यात आली असून, पोलिसांनी प्रकरणाची चौकशी सुरू केली आहे. या वक्तव्यावर राजकीय वर्तुळात तीव्र प्रतिक्रिया उमटत आहेत.
काँग्रेसचे नगरसेवक प्रशांत जगताप यांनी संबंधित भाजप पदाधिकाऱ्यावर टीका करत, “कोंढवा परिसराला सातत्याने बदनाम करण्याचा प्रयत्न केला आहे,” असा आरोप केला. त्यांनी या प्रकरणात कठोर कारवाईची मागणी करत मुख्यमंत्र्यांकडेही तक्रार केली आहे. जगताप पुढे म्हणाले की, “काही विकृत प्रवृत्तीचे लोक जात आणि धर्माच्या आधारावर समाजात फूट पाडण्याचा प्रयत्न करत आहेत. अशा वक्तव्यांमुळे समाजात तणाव निर्माण होऊ शकतो,” असेही त्यांनी नमूद केले.
दरम्यान, या संपूर्ण प्रकरणामुळे पुण्यातील राजकीय वातावरण तापले असून, पोलिसांच्या पुढील कारवाईकडे सर्वांचे लक्ष लागले आहे.