वाल्मिक कराड प्रकरण की… धनंजय मुंडेंची मुख्यमंत्र्यांसोबत अचानक भेट, चर्चेला उधाण

राष्ट्रवादी काँग्रेसचे नेते धनंजय मुंडे यांनी आज मुंबईतील सह्याद्री अतिथीगृहावर राज्याचे मुख्यमंत्री देवेंद्र फडणवीस यांची भेट घेतली. या भेटीसाठी मुंडे सह्याद्री अतिथीगृहावर दाखल झाले होते आणि थोड्याच वेळात त्यांची फडणवीस यांच्याशी भेट झाली. मात्र, या भेटीमागचे नेमके कारण अद्याप समजू शकलेले नाही. या भेटीच्या काही वेळ आधीच, राष्ट्रवादी काँग्रेसच्या शरद पवार गटाचे खासदार बजरंग अप्पा सोनवणे यांनी एक पत्रकार परिषद घेतली होती.

यामध्ये त्यांनी धनंजय मुंडे यांचे नाव घेऊन वाल्मिक कराड यांच्या संदर्भात गंभीर आरोप केले होते. वाल्मिक कराड तुरुंगातूनही कार्यकर्त्यांशी संपर्क साधत असल्याचा आरोप सोनवणे यांनी केला होता. सोनवणे यांनी गृहमंत्र्यांनी या प्रकरणाकडे लक्ष देऊन योग्य ती कारवाई करावी अशी मागणी केली होती. या पार्श्वभूमीवर धनंजय मुंडे यांची मुख्यमंत्री फडणवीस यांच्याशी झालेली भेट महत्त्वाची ठरत आहे. ही भेट वैयक्तिक कामासाठी होती की सोनवणे यांनी उपस्थित केलेल्या मुद्द्यांवर चर्चा करण्यासाठी, हे अद्याप स्पष्ट झालेले नाही. राजकीय वर्तुळात या भेटीबद्दल विविध तर्कवितर्क लढवले जात आहेत.