महाराष्ट्रातील दुष्काळामुळे जनावरांच्या किमती घसरल्या, शेतकरी हवालदिल, नुकसानाचा करावा लागतोय सामना

महाराष्ट्रातील दुष्काळी परिस्थितीचा फटका शेतीसोबतच पशुधनाच्या बाजारालाही बसला आहे. छत्रपती संभाजीनगर येथील छावणी परिसरातील म्हैस बाजारात जनावरांची विक्री ठप्प झाली असून, शेतकऱ्यांनी वर्षभर सांभाळलेल्या म्हशींना कवडीमोल भावाने विकावे लागत आहे. चारापाण्याच्या तीव्र टंचाईमुळे खरेदीदार मिळेनासे झाले आहेत, परिणामी म्हशींच्या किमती मोठ्या प्रमाणात घसरल्या आहेत. सकाळपासून बोटावर मोजण्याइतपत व्यवहार झाल्याचे व्यापारी सांगतात. एकीकडे शेतकऱ्यांनी चांगला भाव मिळेल या आशेने म्हशी सांभाळल्या होत्या, मात्र दुष्काळामुळे त्यांची अपेक्षा धुळीस मिळाली आहे. दीड लाखापर्यंत किंमत असणारी जाफ्राबादी म्हैसही एक लाख दहा हजारांना विकावी लागल्याचे एका शेतकऱ्याने सांगितले. चारा आणि पेंडीचे वाढलेले दर यामुळे जनावरे सांभाळणे अवघड झाले आहे.

या गंभीर परिस्थितीमुळे शेतकरी मोठ्या आर्थिक संकटात सापडले आहेत. सरकारने दुष्काळ जाहीर केला असला तरी, शेतकऱ्यांना कोणतीही ठोस मदत किंवा कर्जमाफी मिळाली नसल्याची त्यांची खंत आहे. तातडीने सरकारी मदतीची आणि उपाययोजनांची मागणी शेतकरी करत आहेत.