अमेरिका – इराण युद्ध; इंदिरा युनिव्हर्सिटीचे 84 विद्यार्थी दुबईत अडकले!

पुणे येथील इंदिरा युनिव्हर्सिटीचे 84 विद्यार्थी दुबईत ग्लोबल इमर्शन प्रोग्रामसाठी गेले असताना, अमेरिका-इराण युद्धाच्या पार्श्वभूमीवर तेथे अडकले आहेत. यामध्ये 42 मुले आणि 42 मुलींचा समावेश आहे. विद्यापीठाच्या अधिकाऱ्यांनी दिलेल्या माहितीनुसार, सर्व विद्यार्थी सुखरूप असून, त्यांच्याशी तसेच त्यांच्या पालकांशी विद्यापीठाचा नियमित संपर्क आहे. दुबईतील फॅकल्टी सदस्यही विद्यार्थ्यांच्या संपर्कात आहेत.

विद्यार्थ्यांना सुरक्षितपणे भारतात परत आणण्यासाठी युद्धपातळीवर प्रयत्न सुरू आहेत. परराष्ट्र मंत्रालय, मुरलीधर मोहोळ आणि दुबईतील भारतीय दूतावासाच्या अधिकाऱ्यांशी संपर्क साधून निवेदने सादर करण्यात आली आहेत. विद्यापीठाच्या अध्यक्ष डॉ. तारका शंकर आणि कुलगुरू आनंद जोशी यांच्या नेतृत्वाखाली हे सर्व समन्वयाचे कार्य सुरू आहे.

विद्यापीठाने पालक आणि विद्यार्थ्यांना काळजी न करण्याचे आवाहन केले आहे. सर्व मुलांशी आणि त्यांच्या पालकांशी आमचे बोलणे सुरू आहे. विद्यापीठाकडून विद्यार्थ्यांना लवकरात लवकर आणि सुरक्षितपणे भारतात परत आणण्यासाठी सर्वतोपरी प्रयत्न केले जात आहेत, अशी माहिती देण्यात आली आहे.