बैल शर्यतीत उतरला की त्याचं नूर..; शिंदेंची सांगलीच्या बैलगाडा शर्यतीला हजेरी

सांगली जिल्ह्यात नुकत्याच आयोजित बैलगाडा शर्यतीच्या भव्य सोहळ्यात उपमुख्यमंत्री  एकनाथ शिंदे यांनी उपस्थिती लावली. यावेळी त्यांनी आयोजक चंद्रहार पाटील यांचे विशेष कौतुक केले. शर्यतीमध्ये पहिल्यांदाच महिलांचा सहभाग झाल्याबद्दलही त्यांनी आनंद व्यक्त केला. शिंदे यांनी शहाजी बापू यांच्या संवादांमुळे आसामचे पर्यटन वाढल्याचा उल्लेख करत, शंभूराज देसाई यांच्या उपस्थितीत शहाजी बापूंना महाराष्ट्राचे पर्यटन ब्रँड अँबॅसिडर करण्याची मागणी केली.

उपमुख्यमंत्री शिंदे यांनी आपल्या भाषणात गोवंशाच्या संरक्षणावर भर दिला. आपल्या सरकारने गोमातेला राज्यमातेचा दर्जा देण्याचा महत्त्वपूर्ण निर्णय घेतला असून, असे करणारे महाराष्ट्र हे देशातील पहिले राज्य बनले असल्याचे त्यांनी सांगितले. एका शंकराचार्यांनी त्यांना काऊ मॅन संबोधल्याचा किस्साही त्यांनी यावेळी सांगितला. चंद्रहार पाटील यांनी लष्करासाठी आयोजित केलेल्या रक्तदान शिबिरासारख्या समाजोपयोगी कार्याचेही शिंदे यांनी कौतुक केले.