‘भाजपमध्ये मन लागलं नाही अन्…’, आधी अशोक चव्हाणांसोबत भाजपप्रवेश, आता पुन्हा घरवापसी

काँग्रेस मधून अशोक चव्हाण यांच्यासोबत अनेकांनी भाजप प्रवेश केला होता, मात्र आता पुन्हा काही पदाधिकारी काँग्रेसमध्ये येत असल्याचे दिसत आहे. दरम्यान, आगामी विधानसभा निवडणुकीच्या पार्श्वभूमीवर नांदेडच्या राजकीय वर्तुळात मोठ्या उलथापालथ होत असल्याचे पाहायला मिळत आहे. माजी जिल्हा परिषद सदस्या आणि माजी महापौर जयश्री पावडे यांनी पुन्हा घरवापसी केली आहे. इतकंच नाहीतर जयश्री पावडे यांनी घरवापसी होताच काँग्रेसकडून तिकीट मागितले आहे. त्यामुळे आगामी विधानसभा निवडणुकीत काँग्रसे भाजप सोडून काँग्रेसमध्ये परतलेल्या जयश्री पावडे यांना उमेदवारी देणार का याकडे साऱ्यांचे लक्ष लागले आहे. दरम्यान, भाजपात मनही लागलं नाही आणि विचारधाराही पटली नाही, असा भाजपातील अनुभव सांगत मी माझ्या कामाच्या मिरीटवर काँग्रेस पक्षाकडे नांदेड उत्तर विधानसभेची उमेदवारी मागितल्याचे जयश्री पावडे यांनी स्पष्ट केले आहे.