विद्यार्थ्यांच्या जीवाशी खेळ की… गडचिरोलीतील डुम्मे शाळेची धक्कादायक अवस्था अभिजीत दीपकेकडून उघड

गडचिरोली जिल्ह्यातील एटापल्ली तालुक्यातील डुम्मे गावातील जिल्हा परिषद शाळेची सामाजिक कार्यकर्ते अभिजीत दीपके यांनी नुकतीच पाहणी केली. या पाहणीदरम्यान शाळेची अत्यंत जीर्ण अवस्था समोर आली आहे. शाळेच्या भिंतींमधून विद्युत प्रवाह उतरत असून, एकाच वर्गखोलीत सहावी, सातवी आणि आठवीचे विद्यार्थी एकत्र बसत असल्याचे दीपके यांनी निदर्शनास आणले.

एकीकडे शाळेची इमारत अक्षरशः पडझडीच्या स्थितीत असताना, दुसरीकडे नेतेमंडळी स्वतःची प्रसिद्धी करण्यासाठी विद्यार्थ्यांना आपल्या छायाचित्रांनी युक्त बॅगा वाटप करत आहेत. या प्रकारावर दीपके यांनी तीव्र आक्षेप घेतला आहे. बॅगांवर स्वतःचे फोटो छापून प्रसिद्धी मिळवण्याऐवजी, शिक्षण व्यवस्थेतील मूलभूत सोयीसुविधांकडे लक्ष देण्याची गरज त्यांनी व्यक्त केली. शाळेतील अनेक विद्यार्थ्यांना इंग्रजीमध्ये स्वतःचे नावही सांगता येत नसल्याचे समोर आले आहे, ज्यामुळे शिक्षणाच्या गुणवत्तेवर गंभीर प्रश्नचिन्ह निर्माण झाले आहे. राशन वाटप करताना किंवा शालेय साहित्य वाटप करताना नेत्यांनी स्वतःच्या प्रसिद्धीचा हव्यास सोडून, विद्यार्थ्यांना खऱ्या अर्थाने चांगल्या शिक्षणाची संधी उपलब्ध करून द्यावी, अशी मागणी अभिजीत दीपके यांनी केली आहे.