Pune : शाळकरी मुलीच्या डोक्यात खांब कोसळला, कसबा पेठेतील घटना

शहरातील दारूवाला पूल परिसरात ड्रेनेज लाईनच्या कामादरम्यान एक लोखंडी खांब अचानक कोसळल्याने धक्कादायक घटना घडली. या अपघातात शाळेतून घरी परतणाऱ्या एका मुलीच्या डोक्यावर खांब पडल्याने ती गंभीर जखमी झाली आहे. सध्या तिच्यावर नजीकच्या रुग्णालयात उपचार सुरू असून, तिची प्रकृती स्थिर असल्याचे प्राथमिक माहितीतून समजते, तरीही तिला वैद्यकीय देखरेखीखाली ठेवण्यात आले आहे. या घटनेमुळे कसबा पेठ परिसरात भीतीचे वातावरण पसरले आहे.

स्थानिक नागरिकांनी ठेकेदार आणि महानगरपालिकेवर सुरक्षेच्या उपाययोजनांकडे दुर्लक्ष केल्याचा आरोप लावला आहे. प्राथमिक माहितीनुसार, ड्रेनेज पाइपलाइन टाकण्याच्या कामादरम्यान रस्त्याच्या कडेला ठेवलेला लोखंडी खांब योग्यप्रकारे स्थिर न केल्याने तो पादचारी मार्गावर कोसळला. याच मार्गावरून चाललेल्या मुलीच्या डोक्यावर आणि खांद्यावर खांब आदळला. मुलीचे नाव अद्याप जाहीर करण्यात आलेले नाही. या घटनेनंतर संतप्त नागरिकांनी काम तात्काळ थांबवण्याची आणि जबाबदार व्यक्तींवर कठोर कारवाईची मागणी केली आहे. अपघाताच्या कारणांचा तपास सुरू असून, प्रशासनाने या प्रकरणाची गंभीर दखल घेतली आहे.