छत्रपती संभाजीनगरात हायकोर्ट टायपिंग परीक्षेत मोठा गोंधळ, नेमकं काय घडलं?

महाराष्ट्रातील छत्रपती संभाजीनगर, कल्याण आणि भंडारा या तीन प्रमुख शहरांमध्ये हायकोर्ट लिपिक पदाच्या परीक्षेवेळी मोठा गोंधळ आणि तांत्रिक अडचणींचा सामना विद्यार्थ्यांना करावा लागला. परीक्षेदरम्यान उद्भवलेल्या समस्यांमुळे संतप्त विद्यार्थ्यांनी विविध ठिकाणी जोरदार घोषणाबाजी आणि आंदोलने केली. छत्रपती संभाजीनगर येथील परीक्षा केंद्रावर टायपिंग सॉफ्टवेअर काम करत नसल्याचा आरोप विद्यार्थ्यांनी केला. यामुळे परीक्षेला बसलेल्या अनेक विद्यार्थ्यांना आपला पेपर पूर्ण करता आला नाही.

या प्रकारामुळे संतप्त झालेल्या विद्यार्थ्यांनी परीक्षा केंद्राबाहेर एकत्र येत “बाहेर या, बाहेर या, न्यायाधीश सर बाहेर या” अशा घोषणा दिल्या. परिस्थिती नियंत्रणात आणण्यासाठी आणि विद्यार्थ्यांची समजूत काढण्यासाठी पोलीस तात्काळ घटनास्थळी पोहोचले. केवळ छत्रपती संभाजीनगरच नव्हे, तर कल्याण येथेही परीक्षेमध्ये अडचणी आल्याचे समोर आले आहे. कल्याणमधील परीक्षा केंद्रावर संगणक अचानक बंद पडल्यामुळे विद्यार्थ्यांमध्ये संतापाची लाट उसळली. तसेच, भंडारा येथे सर्वर ठप्प झाल्यामुळे अनेक विद्यार्थ्यांना परीक्षेला मुकावे लागले, ज्यामुळे त्यांनी ठिय्या आंदोलन केले. या सर्व घटनांमुळे परीक्षा प्रणालीवर प्रश्नचिन्ह निर्माण झाले असून, हजारो विद्यार्थ्यांचे भवितव्य टांगणीला लागले आहे.