जालन्यात गुटख्यावर मोठी कारवाई; 1 कोटी 35 लाखांचा मुद्देमाल जप्त

जालन्यात अन्न व औषध प्रशासन (FDA) आणि पोलिसांनी अवैध गुटखा व्यवसायावर कडक कारवाई केली आहे. राजूर परिसरात केलेल्या या धडक कारवाईत मोठ्या प्रमाणात अवैध गुटखा आणि त्याची वाहतूक करणारी वाहने जप्त करण्यात आली आहेत. पोलिसांनी दिलेल्या माहितीनुसार, या कारवाईदरम्यान ९५ लाख ३० हजार रुपये किमतीचा अवैध गुटखा जप्त करण्यात आला आहे. गुटख्याच्या वाहतुकीसाठी वापरण्यात आलेली ४० लाख रुपये किमतीची चार वाहनेही यावेळी जप्त करण्यात आली. एकूण, या कारवाईत तब्बल १ कोटी ३५ लाख ३० हजार रुपयांचा मुद्देमाल हस्तगत करण्यात आला आहे.

या प्रकरणी दोन आरोपींना अटक करण्यात आली असून, त्यांच्याविरोधात गुन्हा दाखल करण्यात आला आहे. तसेच, अवैध गुटखा पुरवठा करणाऱ्या सप्लायर कंपनीविरोधातही एफडीए आणि पोलिसांनी गुन्हा नोंदवला आहे. ही कारवाई अवैध गुटखा व्यवसायाला आळा घालण्यासाठी एक महत्त्वाचे पाऊल मानले जात आहे.