Manoj Jarange On Viral Clip : एकनाथ शिंदेंच्या मुलांना पैसे दिले, हे रामदास कदमांनीच सांगितलं; जरांगेंचा दावा, महायुतीत पुन्हा खळबळ

राज्याच्या राजकारणात सध्या व्हायरल झालेल्या एका ऑडिओ क्लिपमुळे मोठी खळबळ उडाली आहे. या क्लिपवरून आरोप-प्रत्यारोप सुरू असताना, मराठा आरक्षणाचे नेते मनोज जरांगे पाटील यांनी रामदास कदम यांच्यावर गंभीर आरोप केले आहेत. एकनाथ शिंदे यांची बदनामी सर्वात आधी रामदास कदम यांनीच केली असल्याचा दावा जरांगे यांनी केला आहे.

या व्हायरल क्लिपमध्ये शिंदे यांच्या मुलांबद्दल कथित टिप्पणी आहे. या संदर्भात बोलताना जरांगे यांनी म्हटले आहे की, “एकनाथ शिंदे यांच्या मुलांना पैसे दिले, हे महाराष्ट्राला सर्वात आधी रामदास कदम यांनीच सांगितले. शिंदे साहेबांची बदनामी रामदास कदम यांनीच केली.” लाचार कोण आहे आणि बेईमान कोण आहे, हे मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांना कळत नाही का, असा सवालही जरांगे यांनी उपस्थित केला आहे.

ही क्लिप कोणी दिली, हे रामदास कदम यांनाच माहिती असल्याचा दावा जरांगे यांनी केला आहे. या क्लिपमुळे शिवसेना आणि भाजपच्या नेत्यांमधील वादाची ठिणगी विझताना दिसत नाहीये, असेही ते म्हणाले. मित्रपक्षात असूनही एकमेकांच्या विरोधात बोलणे योग्य नाही, अशी भावना त्यांनी व्यक्त केली.