Jayant Patil on Shaktipeeth Highway : शेतकऱ्यांच्या मागण्या मान्य होत नाहीत, तोपर्यंत…. जयंत पाटील आक्रमक

राष्ट्रवादी काँग्रेसचे नेते जयंत पाटील यांनी सोलापूर जिल्ह्यातील प्रस्तावित शक्तीपीठ महामार्गावरून सरकारवर जोरदार टीका केली आहे. शेतकऱ्यांच्या तीव्र विरोधाला न जुमानता प्रशासनाकडून जबरदस्तीने जमिनीची मोजणी केली जात असून, पोलीस बळाचा गैरवापर केला जात असल्याचा आरोप पाटील यांनी केला. शेतकरी आत्महत्येसारखं टोकाचं पाऊल उचलत असतानाही महसूल आणि पोलीस यंत्रणा दाद देत नसल्याचे त्यांनी म्हटले आहे.

जिल्हाधिकारी कार्यालयात झालेल्या बैठकीनंतर पाटील यांनी माध्यमांशी संवाद साधला. या महामार्गासाठी शेतकऱ्यांची संमती नसतानाही मोजणी सुरू असल्यामुळे सोलापूर जिल्ह्यात गंभीर प्रश्न निर्माण झाले आहेत. दुष्काळाने ग्रस्त असलेल्या शेतकऱ्यांना तुटपुंजी मदत दिली जात असताना, दुसरीकडे हजारो कोटींचा हा महामार्ग प्रकल्पावर सरकार पैसे कुठून आणत आहे, असा प्रश्नही त्यांनी उपस्थित केला. वाढत्या महागाईमुळे सामान्य जनतेचे कंबरडे मोडले असून, सरकारने आर्थिक बाबींमध्ये अधिक शहाणपणाचे निर्णय घेण्याचे आवाहन त्यांनी केले. जोपर्यंत शेतकऱ्यांच्या मागण्या मान्य होत नाहीत, तोपर्यंत शक्तीपीठ महामार्ग रद्द करावा अशी भूमिका जयंत पाटील यांनी मांडली.