दक्षिणेकडे भाजपला सर्वात मोठा धक्का, पक्षातील बड्या नेत्याने अचानक दिला राजीनामा अन्…

केरळ भाजपचे उपाध्यक्ष देवन यांनी पक्षाला रामराम करत आपल्या पदाचा आणि पक्षाच्या सदस्यत्वाचा राजीनामा दिला आहे. त्यांच्या या निर्णयामुळे केरळ भाजपमध्ये मोठी खळबळ उडाली आहे. देवन हे पक्षातील एक महत्त्वाचे नेते मानले जात होते. देवन यांनी आपल्या राजीनाम्यामागे दोन प्रमुख कारणे दिली आहेत.

पहिले कारण म्हणजे, भाजपने समाजसुधारक नारायण गुरु यांच्या विचारांपासून स्वतःला दूर नेल्याचा आरोप त्यांनी केला आहे. नारायण गुरु हे केरळमधील एक महत्त्वपूर्ण आध्यात्मिक नेते आणि समाजसुधारक होते, ज्यांनी समानता आणि सामाजिक न्यायाचा पुरस्कार केला होता. देवन यांच्या मते, पक्ष त्यांच्या मूलभूत तत्त्वांचे पालन करत नाही.

दुसरे कारण म्हणजे, पक्षातील अंतर्गत गटबाजीला ते कंटाळले होते. देवन यांनी पक्षातील अंतर्गत गटबाजी आणि संघर्षामुळे आपल्या कामात अडचणी येत असल्याचे म्हटले आहे. या दोन प्रमुख कारणांमुळे त्यांनी पक्षातून बाहेर पडण्याचा निर्णय घेतल्याची चर्चा राजकीय वर्तुळात सध्या जोरदार सुरू आहे. त्यांच्या या राजीनाम्यामुळे केरळमध्ये भाजपला मोठा धक्का बसल्याचे मानले जात आहे.