कोल्हापुरात पावसाअभावी काढणीला आलेली पिके धोक्यात, शेतकरी हवालदिल

कोल्हापूर जिल्ह्यात गेल्या दीड महिन्यापासून पावसाने दडी मारल्यामुळे शेतकरी मोठ्या संकटात सापडले आहेत. काढणीला आलेली भुईमूग, भात आणि सोयाबीन यांसारखी प्रमुख पिके पाण्याअभावी वाळू लागली आहेत. अनेक ठिकाणी सोयाबीनचे दाणे भरले नाहीत तर भुईमुगाच्या शेंगा अपूर्ण राहिल्या आहेत.

यामुळे शेतकऱ्यांचे मोठे आर्थिक नुकसान होताना दिसत आहे. यावर्षी सुरुवातीला पाऊस लांबणीवर पडला, नंतर अपेक्षित प्रमाणात बरसला नाही आणि आता गेल्या दीड महिन्यापासून पूर्णपणे गायब झाला आहे. यामुळे पाणीदार जिल्हा म्हणून ओळखल्या जाणाऱ्या कोल्हापूरमध्ये सप्टेंबर-ऑक्टोबर महिन्यात पिके वाळण्याची ही पहिलीच वेळ आहे. शेतकऱ्यांनी पिकांसाठी केलेला लाखो रुपयांचा खर्च आणि कष्ट वाया जात आहेत. शासनाने तात्काळ कोरडा दुष्काळ जाहीर करून आर्थिक मदत करावी अशी मागणी शेतकरी करत आहेत.