कोळवणकर कुटुंबियांचा पर्यावरणपूरक गोकर्ण मंदिराचा देखावा आणि आत्मलिंग कथा

कोकणात घरगुती गणपती उत्सवात पौराणिक देखावे सादर करण्याची परंपरा आजही टिकून आहे. या परंपरेचे पालन करत, कोळवणकर कुटुंबियांनी यावर्षी एक आकर्षक आणि पर्यावरणपूरक देखावा साकारला आहे. त्यांनी गोकर्ण मंदिराची सुंदर प्रतिकृती तयार केली असून, त्यासाठी कागद, पुठ्ठा, वाळू आणि वेलींसारख्या इको-फ्रेंडली वस्तूंचा वापर केला आहे. या देखाव्याचे मुख्य आकर्षण म्हणजे शंकराकडून आत्मलिंग घेतलेल्या रावणाला गणपतीने कसे धडा शिकवला, हा पौराणिक प्रसंग. कथेनुसार, रावणाने शंकराकडून आत्मलिंग प्राप्त केले होते आणि त्याला लंकेत घेऊन जाऊन तीन वर्षे पूजा करून शंकरासारखी शक्ती मिळवायची होती.

मात्र, नारदांच्या सूचनेनुसार रावणाने संध्या करण्यास सुरुवात केली, तेव्हा त्याने हे आत्मलिंग एका बालकाच्या हाती ठेवले. ते बालक दुसरे कोणी नसून गणपतीच होते. गणपतीने ते आत्मलिंग खाली ठेवले आणि तिथेच त्याची स्थापना झाली, ज्यामुळे रावणाचा उद्देश सफल झाला नाही. हा प्रसंग या देखाव्यातून अतिशय प्रभावीपणे मांडण्यात आला आहे. कोळवणकर कुटुंबियांचा हा प्रयत्न पारंपरिक वारसा जपण्यासोबतच पर्यावरण संरक्षणाचा संदेशही देतो.