Babasaheb Patil | अश्लीलता नेमकी कशाला म्हणायचं? लावणीतील वाढत्या अश्लीलतेवर बाबासाहेब पाटील आक्रमक; थेट सरकारला…

राष्ट्रवादी काँग्रेसच्या (अजित पवार गट) चित्रपट सांस्कृतिक विभागाचे प्रमुख बाबासाहेब पाटील यांनी लावणी आणि सार्वजनिक नृत्यांमध्ये वाढलेल्या अश्लीलतेवर चिंता व्यक्त केली आहे. त्यांनी मुख्यमंत्री, सांस्कृतिक मंत्री आणि गृहमंत्री यांना पत्र लिहून अश्लीलतेची स्पष्ट व्याख्या करणारी नियमावली तयार करण्याची मागणी केली आहे.

पाटील यांच्या मते, दहीहंडीच्या उत्सवांमध्ये अनेक नृत्यांगनांवर गुन्हे दाखल झाले आहेत. परंतु, अश्लीलता नेमकी कशाला म्हणावे, याची स्पष्ट व्याख्या नसल्यामुळे पोलीस आणि संबंधित यंत्रणांना कारवाई करताना अडचणी येत आहेत. काही नृत्यांगना स्टेजवरून खाली येऊन प्रेक्षकांच्या मांडीवर बसणे, गालावरून हात फिरवणे किंवा अश्लील हावभाव करणे असे प्रकार करतात. या प्रकारांना आळा घालण्यासाठी कडक नियमावलीची आवश्यकता आहे, असे पाटील यांनी म्हटले आहे.

रंगभूमी परिनिरीक्षण मंडळाने यापूर्वी अश्लील गाण्यांवर निर्बंध घालण्याचा जीआर काढला होता, मात्र कलाकारांनी सेन्सर प्रमाणपत्र न घेतल्याने अनेक गुन्हे दाखल झाले. आता केवळ प्रमाणपत्रच नव्हे, तर अश्लीलतेची ठोस व्याख्या आणि नियमावली नसल्यामुळे परिस्थिती अधिकच गुंतागुंतीची झाली आहे. पाटील यांनी येत्या आठवड्याभरात सरकारकडून यावर ठोस निर्णय होण्याची अपेक्षा व्यक्त केली आहे.