माधुरी हत्तीण नांदणी मठात परतली, हजारो नागरिकांनी उत्साहात केले स्वागत

वनतारा येथून हत्तीण माधुरीचे कोल्हापूर जिल्ह्यातील नांदणी मठात पुनरागमन झाले आहे. एक वर्षांहून अधिक काळ चाललेल्या संघर्षाला यश मिळाल्यानंतर, माधुरी मठात परतल्याने पंचक्रोशीत आनंदाचे वातावरण आहे. फटाक्यांची आतषबाजी आणि फुलांची उधळण करत हजारो नागरिकांनी माधुरीचे नांदणीमध्ये मोठ्या उत्साहात स्वागत केले. माधुरीच्या आगमनासाठी नागरिकांनी सायंकाळपासूनच तिची वाट पाहिली होती. तब्बल एक वर्षाच्या प्रतीक्षेनंतर अखेर माधुरी हत्तीण नांदणी मठामध्ये परतली. तिच्या निवासस्थानापर्यंत आणताना फलाहार आणि फुलांच्या वर्षावाने तिचा मार्ग सजवण्यात आला होता.

या घटनेमुळे नांदणीसह संपूर्ण पंचक्रोशीतील नागरिकांना समाधान वाटले असून, हा त्यांच्यासाठी एक ऐतिहासिक आणि आनंदाचा क्षण ठरला आहे. सर्व लोकप्रतिनिधी आणि नागरिकांनी या लढ्यात योगदान दिल्याचे नमूद करण्यात आले. कोल्हापूरकरांनी दाखवलेला हा निर्धार आणि एकता यामुळे माधुरीचा परतीचा मार्ग सुकर झाला.