Maharashtra Farmer Issue : कर्नाटकात दुष्काळ जाहीर महाराष्ट्रात कधी? आजच्या कॅबिनेट बैठकीवर राज्याचं लक्ष

राज्यातील बहुतांश जिल्ह्यांमध्ये दुष्काळसदृश स्थिती निर्माण झाली असून, विरोधकांनी राज्य सरकारकडे तातडीने दुष्काळ जाहीर करण्याची मागणी केली आहे. मंत्री बावनकुळे यांनी माहिती दिली की, मुख्यमंत्री देवेंद्र फडणवीस दुष्काळी स्थितीवर बारकाईने लक्ष ठेवून आहेत. मात्र, विरोधी पक्षांनी सरकारवर चालढकलपणाचा आरोप केला आहे.

कर्नाटक सरकारने त्यांच्या राज्यात दुष्काळ जाहीर करण्याचा निर्णय घेतला असताना, महाराष्ट्र सरकार कोणत्या गोष्टीची वाट पाहत आहे, असा प्रश्न विरोधकांनी उपस्थित केला आहे. कर्नाटकच्या मुख्यमंत्र्यांनी तातडीने हा निर्णय घेतल्याचे उदाहरण देत, महाराष्ट्रानेही कोणतीही तांत्रिक अडचण न पाहता त्वरित दुष्काळ जाहीर करावा अशी त्यांची मागणी आहे. यासंदर्भात राष्ट्रवादी काँग्रेसचे अध्यक्ष शरद पवार यांनीही मुख्यमंत्री महोदयांना पत्र पाठवून त्वरित निर्णय घेण्याची विनंती केली आहे.

आज होणाऱ्या मंत्रिमंडळाच्या बैठकीत मदत पुनर्वसन विभागाचे प्रधान सचिव आणि कृषी विभागाचे सचिव दुष्काळ परिस्थितीची माहिती मंत्रिमंडळासमोर सादर करतील. या बैठकीत दुष्काळासंदर्भात आवश्यक निर्णय घेण्याबाबत चर्चा होण्याची शक्यता आहे. २०१७ आणि २०१८ मधील दुष्काळी परिस्थितीमध्ये घेतलेल्या निर्णयांचा संदर्भ देत, आजच्या चर्चेअंती काय निर्णय घेतला जातो, याकडे सर्वांचे लक्ष लागले आहे.