Rain Update : अडीच महिन्यांनंतर महाराष्ट्रात पावसाची हजेरी; रत्नागिरी, चिपळूणसह ह्या जिल्ह्यात बरसल्या पावसाच्या सरी

राज्यात गेल्या दोन ते अडीच महिन्यांच्या मोठ्या खंडानंतर अखेर काही भागांत तुरळक आणि वादळी पावसाने हजेरी लावली आहे. दीर्घकाळच्या प्रतीक्षेनंतर आलेल्या या पावसामुळे नागरिकांना काही प्रमाणात दिलासा मिळाला आहे. विशेषतः रत्नागिरी, चिपळूण, कोल्हापूर आणि सांगली या जिल्ह्यांमध्ये पावसाचे आगमन झाले आहे.

या पावसामुळे रत्नागिरी आणि चिपळूणसारख्या ठिकाणी वातावरणात गारवा निर्माण झाला. कोल्हापुरात अचानक आलेल्या पावसामुळे अंबाबाई मंदिर परिसरात उपस्थित भाविकांची काही प्रमाणात तारांबळ उडाली. तसेच, सांगली जिल्ह्यातही अनेक ठिकाणी पावसाच्या सरी कोसळल्याचे चित्र होते.

दरम्यान, हवामान विभागाने पुढील काळासाठी पावसाचा अंदाज वर्तवला आहे. त्यानुसार, २२ ते २९ ऑक्टोबर दरम्यान मध्य महाराष्ट्र आणि कोकण विभागात तुरळक ठिकाणी पावसाची शक्यता आहे. दुष्काळसदृश परिस्थिती आणि पाण्याची तीव्र टंचाई यामुळे त्रस्त असलेल्या राज्यासाठी हा पाऊस महत्त्वपूर्ण मानला जात आहे.