Shivsena Banner | गांजाच्या झाडाने तुळशीला पवित्रता शिकवू नये! बॅनरबाजीमुळे महायुतीमधील अंतर्गत वाद चव्हाट्यावर

महायुतीमधील अंतर्गत मतभेद पुन्हा एकदा उघडपणे समोर आले असून नंदुरबार जिल्ह्यातील तळोदा नगरपालिकेतील वाद आता राजकीय चर्चेचा विषय ठरला आहे. तळोदा नगरपालिकेच्या सर्वसाधारण सभेनंतर निर्माण झालेला वाद थेट रस्त्यावर पोहोचला असून शिवसेना एकनाथ शिंदे गटाच्या कार्यकर्त्यांकडून नगराध्यक्षांविरोधात बॅनरबाजी करण्यात आली आहे.

तळोदा शहरातील विविध ठिकाणी लावण्यात आलेल्या बॅनर्समधून नगराध्यक्षांवर अप्रत्यक्षपणे टीका करण्यात आली आहे. “गांजाच्या झाडाने तुळशीला पवित्रता शिकवू नये,” असा मजकूर असलेल्या बॅनर्सद्वारे नगराध्यक्षांवर निशाणा साधण्यात आल्याने राजकीय वातावरण तापले आहे. या बॅनरबाजीमुळे महायुतीतील घटक पक्षांमधील अंतर्गत नाराजी आणि मतभेद पुन्हा एकदा चव्हाट्यावर आले आहेत.

स्थानिक पातळीवरील राजकीय संघर्षामुळे तळोदा नगरपालिकेतील सत्ताधारी गटांमध्ये तणावाचे वातावरण निर्माण झाले असून या प्रकरणावर अद्याप संबंधित नेत्यांकडून अधिकृत प्रतिक्रिया आलेली नाही. मात्र, बॅनरबाजीमुळे महायुतीतील अंतर्गत संघर्षाची चर्चा राजकीय वर्तुळात रंगू लागली आहे.

दरम्यान, या वादाचे पुढे कोणते राजकीय पडसाद उमटतात आणि संबंधित पक्ष नेमकी काय भूमिका घेतात, याकडे स्थानिक नागरिकांसह राजकीय निरीक्षकांचे लक्ष लागले आहे.