Manoj Jarange Patil : पोहरादेवीत मनोज जरांगे पाटील नतमस्तक; बाबूसिंग महाराजांच्या भेटीने राजकीय चर्चांना उधाण!

मराठा आंदोलक मनोज जरांगे पाटील यांनी आज वाशिम जिल्ह्यातील पोहरादेवी येथे भेट दिली. पोहरादेवी हे बंजारा समाजाची काशी म्हणून ओळखले जाते. या दौऱ्यात जरांगे पाटील यांनी संत सेवालाल महाराज आणि जगदंबा देवीचे दर्शन घेतले. यावेळी जरांगे पाटील यांनी पोहरादेवीचे महंत आणि भाजपचे विधान परिषदेचे आमदार बाबूसिंग महाराज यांची भेट घेतली. मनोज जरांगे पाटील हे दर्शनासाठी येत असल्याची माहिती बाबूसिंग महाराजांच्या पीएने त्यांना दिली होती.

ही भेट केवळ भक्तीभावाने प्रेरित असल्याचे बाबूसिंग महाराजांनी नमूद केले, मात्र या भेटीत मराठा आरक्षण आणि बंजारा समाजाच्या आरक्षणाबाबत चर्चा होण्याची शक्यता वर्तवली जात आहे. बाबूसिंग महाराज यांनी स्पष्ट केले की ते बंजारा समाजाचे धर्मगुरु असल्याने आपल्या समाजाला न्याय मिळवून देण्यासाठी प्रयत्न करतील. दिवाळीच्या शुभ मुहूर्तावर झालेल्या या भेटीला आध्यात्मिक आणि सामाजिक महत्त्व प्राप्त झाले आहे.