Mira Road | फोनवर बोलत रस्ता ओलांडताना डोक्यावर काहीतरी कोसळलं; 23 वर्षीय तरुण जखमी, पण घटनास्थळी वेगळंच सत्य समोर

मीरा रोड, काशिमिरा परिसरात सुरू असलेल्या मेट्रो कामादरम्यान एका २३ वर्षीय तरुणाला अपघात होऊन तो जखमी झाला आहे. पुलाखाली रस्ता ओलांडताना फोनवर बोलत असलेल्या या तरुणाच्या डोक्यावर सिमेंटचा ब्लॉक कोसळल्याचे सुरुवातीला वृत्त होते. मात्र, टीव्ही ९ मराठीच्या पथकाने घटनास्थळी पाहणी केली असता वेगळीच माहिती समोर आली.

प्रत्यक्षात, वर सुरू असलेल्या आरसीसी कामातून एक लाकडी तुकडा तरुणाच्या डोक्यावर पडल्याने त्याला गंभीर दुखापत झाली. दुपारी १ वाजण्याच्या सुमारास ही घटना घडली. जखमी तरुणाला तात्काळ मीरा रोड येथील वोक्हार्ट रुग्णालयात दाखल करण्यात आले असून, सध्या त्याची प्रकृती स्थिर असल्याचे डॉक्टरांनी सांगितले आहे.

पोलिसांनी या घटनेची नोंद घेतली असून, गुन्हा दाखल करण्याची प्रक्रिया सुरू आहे. टीव्ही ९ मराठीसाठी वैभव घाग यांनी मीरा भाईंदरमधून ही बातमी दिली आहे.