महाडचं बिहार करायचं आहे का? मनसे नेते अविनाश जाधव आक्रमक

महाडमध्ये गुन्हेगारी वाढत असल्याचा आरोप करत महाराष्ट्र नवनिर्माण सेनेचे नेते अविनाश जाधव यांनी पोलीस प्रशासनावर गंभीर प्रश्नचिन्ह उपस्थित केले आहे. महाड मनसे शहर प्रमुख पंकज उमासरे यांच्यावर झालेल्या जीवघेण्या हल्ल्यानंतरही मुख्य आरोपीला अटक न केल्याने जाधव यांनी तीव्र नाराजी व्यक्त केली. त्यांच्या म्हणण्यानुसार, आरोपीला मंत्र्यांच्या बंगल्यावर पाहिले गेले होते, तरीही पोलीस कारवाई करत नाहीत.

जाधव यांनी महाडमध्ये भंगार माफिया गुन्हेगारी वाढवत असून तरुणांना प्रवृत्त करत असल्याचे म्हटले आहे. त्यांनी पोलिसांना शनिवारपर्यंत मुख्य आरोपीला अटक करण्याची मुदत दिली आहे, अन्यथा सोमवारी महाड बंद पुकारण्यात येईल असे जाहीर केले आहे. या बंदमध्ये मुंबईसह परिसरातील मनसे पदाधिकारी आणि सामाजिक संस्था सहभागी होतील, असेही त्यांनी सांगितले. जाधव यांनी महाडमधील व्यापारी आणि नागरिकांना या बंदमध्ये सहभागी होण्याचे आवाहन केले आहे.