Thackeray Brothers Alliance : …त्यामुळे भेटीगाठी सुरू, ठाकरे सेनेच्या शिवतीर्थवरील भेटी-गाठीचं कारण मनसे नेत्यानं स्पष्टच सांगितलं

महाराष्ट्र नवनिर्माण सेनेचे नेते नितीन सरदेसाई यांनी युती संदर्भात महत्त्वाचे वक्तव्य केले आहे. युतीबाबतच्या चर्चा अंतिम टप्प्यात आल्या असून लवकरच राज ठाकरे याबाबतची घोषणा करतील, असे सरदेसाईंनी सांगितले आहे. हे विधान अनिल परब यांनी राज ठाकरे यांची शिवतीर्थ निवासस्थानी भेट घेऊन मातोश्री निवासस्थानी परतल्यानंतर आले आहे. राज ठाकरे यांच्यासोबत अनिल परब यांनी तब्बल अर्धा तास चर्चा केली. ही भेट युती संदर्भातील असल्याचे सरदेसाई यांनी स्पष्ट केले. सरदेसाई यांनी सांगितले की, युतीची चर्चा अंतिम टप्प्यात असली तरी ती कधी जाहीर होईल हे सांगणे कठीण आहे. मात्र, लवकरात लवकर निर्णय घेण्याचा सगळ्याच बाजूंनी प्रयत्न सुरू आहे. राष्ट्रवादी शरद पवार गटाला युतीत घेण्याचा किंवा न घेण्याचा निर्णय शिवसेना (ठाकरे गट) यांच्याकडे असलेला विषय आहे, त्यावर मनसे भाष्य करणे योग्य नाही, असेही त्यांनी नमूद केले. युतीच्या चर्चेमध्ये अनिल परब यांचाही सहभाग असून, नेत्यांच्या भेटीगाठी स्वाभाविक असल्याचे सरदेसाईंनी स्पष्ट केले.