Mumbai- Pune Traffic Update : मुंबई- पुणे एक्स्प्रेस वेवरील वाहतूक 32 तासांनंतर सुरु

मुंबई-पुणे एक्स्प्रेस वेवरील वाहतूक तब्बल बत्तीस तासांनंतर अखेर सुरळीत सुरू झाली आहे. मुंबईच्या दिशेने जाणाऱ्या लेनमध्ये एक गॅस टँकर उलटल्याने हा महामार्ग बत्तीस तास ठप्प होता. या अपघातामुळे मुंबई-पुणे महामार्गावर वाहनांच्या लांबच लांब रांगा लागल्या होत्या, ज्यामुळे प्रवाशांना मोठा त्रास सहन करावा लागला.

उलटलेला गॅस टँकर चार क्रेनच्या मदतीने बाजूला करण्यात आला. हायवे पोलिसांच्या अथक प्रयत्नांनंतर रात्री उशिरा वाहतूक पुन्हा सुरू करण्यात यश आले, मात्र अद्यापही वाहतूक संथ गतीने सुरू आहे. या वाहतूक कोंडीमध्ये काही प्रवासी चोवीस तासांहून अधिक काळ अडकून पडले होते, अशी माहिती मिळाली आहे. नागरिकांनी या परिस्थितीत व्यवस्थेवरील संताप व्यक्त केला. या घटनेने मुंबई-पुणे एक्स्प्रेस वेवरील आपत्कालीन व्यवस्थापनाच्या तयारीवर प्रश्नचिन्ह निर्माण झाले आहे.