Mumbai Rain Updates | मुंबईच्या दादरमध्ये पावसाची हजेरी! रिमझिम सरींनी मुंबईकरांना दिलासा

मुंबई आणि उपनगरात बऱ्याच कालावधीनंतर पावसाने हजेरी लावली आहे. विशेषतः दादर परिसरात सकाळपासून रिमझिम पाऊस सुरू असून, शहर आणि उपनगराच्या अनेक भागांमध्ये ढगाळ वातावरण दिसून येत आहे. ऑगस्ट महिना पूर्णतः कोरडा गेल्यानंतर गणेशोत्सवाच्या अगदी तोंडावर आलेल्या या पावसाने मुंबईकरांना मोठा दिलासा मिळाला आहे.

सकाळपासून पडणाऱ्या या पावसामुळे मुंबईच्या वाहतूक व्यवस्थेवर अद्याप कोणताही परिणाम झालेला नाही. रविवारचा दिवस असल्याने रस्त्यांवर गर्दी कमी आहे. तसेच, शहरातील सखल भागांमध्ये पाणी साचल्याचे प्रकारही दिसून आलेले नाहीत. हवामान खात्याने पुढील दिवसभर आणि येत्या दोन दिवसांसाठी अशाच प्रकारच्या पावसाची शक्यता वर्तवली आहे. गणेशोत्सवाची लगबग सुरू असताना आलेल्या या पावसामुळे वातावरण आल्हाददायक झाले आहे.