ज्ञानेश कुमार यांच्या आग्रा निवासस्थानाबाहेर आंदोलन, काँग्रेसच्या नेत्यांना अटक

मुख्य निवडणूक आयुक्त ज्ञानेश कुमार यांच्या आग्रा येथील निवासस्थानाबाहेर काँग्रेस कार्यकर्त्यांनी काल आंदोलन केले. आंदोलकांनी कुमार यांच्या घराच्या मुख्य गेटवर गद्दार आणि व्होट चोर असे शब्द लिहिले. तसेच गेटवर काळी शाई फासून निषेध व्यक्त करण्यात आला. काँग्रेस नेते पवन खेरा यांनी ज्ञानेश कुमार यांच्या घराबाहेर झालेल्या या आंदोलनाचा व्हिडिओ ट्वीट केला होता. या घटनेवेळी घटनास्थळी पोलिसांचा बंदोबस्त नव्हता. काही काळानंतर आंदोलक तिथून निघून गेले.

माहिती मिळाल्यानंतर पोलीस घटनास्थळी दाखल झाले आणि त्यांनी गेटवरील लिहिलेले शब्द व फासलेली काळी शाई साफ केली. यानंतर पोलिसांनी सीसीटीव्ही फुटेजच्या आधारे आंदोलकांची ओळख पटवली. तपासानंतर, काँग्रेसच्या दोन स्थानिक नेत्यांना या प्रकरणी अटक करण्यात आली आहे. मुख्य निवडणूक आयुक्तांच्या निवासस्थानाबाहेर झालेल्या या आंदोलनाने राजकीय वर्तुळात खळबळ उडवून दिली आहे.