Nanded Election : धर्माबादमध्ये मतदारांना मंगल कार्यालयात डांबलं, पैसे वाटपापूर्वीच पळापळ, नेमकी भानगड काय?

नांदेड जिल्ह्यातील धर्माबाद नगरपालिका निवडणुकीच्या मतदानाच्या दिवशी अनेक गंभीर घटना समोर आल्या आहेत, ज्यामुळे निवडणूक प्रक्रियेच्या पारदर्शकतेवर प्रश्नचिन्ह निर्माण झाले आहे. मतदारांना पैशांचे आमिष दाखवून मंगल कार्यालय आणि मंदिरात डांबून ठेवल्याचे धक्कादायक आरोप झाले आहेत. धर्माबादमधील इनामी मंगल कार्यालयात मतदारांना दोन ते तीन तास डांबून ठेवल्याचा आरोप महिला मतदारांनी केला आहे. त्यांना मतदानासाठी पैसे देण्याचे आश्वासन देऊन तेथे बोलावण्यात आले होते. सुरुवातीला १,००० रुपये देण्यात आले होते आणि मतदानाच्या दिवशी ३,००० किंवा ४,००० रुपये देण्याचे वचन दिल्याचे या महिलांनी सांगितले. मात्र, पोलीस येत असल्याची बातमी मिळताच कार्यालयात एकच पळापळ झाली. भाजपच्या पदाधिकाऱ्यांनी भिंतीवरून उड्या मारून पळ काढल्याचा आरोप आहे, तर काहीजण आमदार राजेश पवार यांचा फोटो असलेल्या गाडीतून पसार झाले. टीव्ही 9 मराठीची टीम घटनास्थळी पोहोचल्यावर या मतदारांची सुटका करण्यात आली.