‘… ते संजय राऊत यांना माहीत नाही’, ‘सामना’तील टीकेवर बोलताना शरद पवार यांनी फटकारलं

मुंबई : राष्ट्रवादीचे सर्वेसर्वा शरद पवार (Sharad Pawar) यांनी राष्ट्रवादीच्या अध्यक्षपदाचा राजीनामा दिला आणि तो त्यांनी मागेही घेतला. मात्र शरद पवार यांनी राजीनामा दिल्यानंतर राष्ट्रवादीच्या कार्यकर्त्यांमध्ये एकच खळबळ उडाली होती. मात्र शरद पवार यांनी पक्षातील बडे नेते तसेच कार्यकर्त्यांनी आग्रह केल्याने आपला निर्णय मागे घेतला आणि सुरू असलेल्या राजकीय नाट्याला पूर्णविराम मिळाला. मात्र यासंदर्भात काल दैनिक ‘सामना’च्या अग्रलेखातून भाष्य करण्यात आलं होतं. ‘सामना’च्या अग्रलेखातून पहिल्यांदाच शरद पवार आणि राष्ट्रवादीच्या उणीवा दाखवण्यात आल्या होत्या. शरद पवार हे राजकीय वारस निर्माण करण्यात अपयशी ठरल्याचंही अग्रलेखातून म्हणत त्यांच्यावर निशाणा साधला होता. यावर शरद पवार यांनी प्रथमच भाष्य केले आहे. मोजक्या शब्दांत पवारांनी संजय राऊत (Sanjay Raut) यांना जोरदार प्रत्युत्तर दिले आहे. आम्ही काय केले हे संजय राऊत यांना माहिती नाही, हा आमच्या घरातील प्रश्न आहे. राष्ट्रवादी काँग्रेसने अनेक नेत्यांना संधी देऊन मंत्री केले आहे. आम्ही कुणाला संधी दिली आणि काय केलं हे जाहीर करत नाही, तसेच कोणी आमच्यावर टीका केली तरी आम्ही दुर्लक्ष करतो, अशा शब्दांमध्ये शरद पवार यांनी संजय राऊत यांना चांगलेच फटकारले आहे.