Pune : महिला आयोगाचं काम, मेकअपसाठी थांब! रूपाली ठोंबरेंचं चाकणकरांविरोधात आंदोलन, केली एकच मागणी

पुण्यात राष्ट्रवादी काँग्रेसच्या अजित पवार गटातील नेत्या रुपाली पाटील ठोंबरे यांनी राज्य महिला आयोगाच्या अध्यक्षा रुपाली चाकणकर यांच्या विरोधात आंदोलन केले. पुण्यातील गुडलक चौकात हे आंदोलन झाले, ज्यात चाकणकर यांच्या राजीनाम्याची मागणी करण्यात आली. रुपाली चाकणकर या राष्ट्रवादीच्याच नेत्या आहेत, त्यामुळे पक्षातीलच एका नेत्याने दुसऱ्या नेत्याविरोधात केलेल्या या आंदोलनाची चर्चा आहे. या आंदोलनाचे मुख्य कारण फलटण येथील एका महिला डॉक्टरच्या आत्महत्येचे प्रकरण आहे. या प्रकरणात रुपाली चाकणकर यांनी पीडित महिला डॉक्टरचे चारित्र्यहनन केल्याचा आरोप रुपाली पाटील ठोंबरे यांनी केला आहे.

महिला आयोगाच्या अध्यक्षांकडून न्याय मिळण्याऐवजी पीडितेची बदनामी झाल्याचा दावा ठोंबरे यांनी केला. त्यांनी प्रश्न विचारला की, “महिला आयोग की पुरुष आयोग?” या आंदोलनात रुपाली पाटील ठोंबरे यांच्यासोबत काँग्रेसच्या संगीता तिवारी आणि शिवसेना (उद्धव बाळासाहेब ठाकरे) पक्षाच्या रेखा कोंडे यांनीही सहभाग घेतला. सुनील तटकरे आणि अजित पवार यांनी या प्रकरणी कारवाई करावी, अशी मागणी आंदोलनकर्त्यांनी केली आहे.