मर्सिडीजमधून येणाऱ्यांना लगेच कर्ज! नितीन गडकरींचा बँकिंग व्यवस्थेला मिश्किल टोला

केंद्रीय मंत्री नितीन गडकरी यांनी नागपूर नागरिक बँकेच्या एका कार्यक्रमात बँकिंग व्यवस्थेवर मार्मिक भाष्य केले. बँकेच्या यशाचे श्रेय त्यांनी संस्थेचे नेतृत्व, त्यांचा चारित्र्य, क्रेडिबिलिटी आणि विश्वसनीयता यांना दिले. संघ स्वयंसेवकांनी स्थापन केलेल्या या बँकेने व्यावसायिक दृष्ट्या कसे यश मिळवले, याचे उदाहरण त्यांनी दिले. प्रारंभी, प्रभाकरराव फैजपूरकर या प्रचारकांनी घरोघरी जाऊन भांडवल गोळा केल्याचे त्यांनी सांगितले. नंतर प्रेमजीभाई शहा, जमनादासजी शहा, कैलासचंद्र अग्रवाल, रमेश मंत्री यांसारख्या अनेकांनी बँकेच्या वाढीसाठी योगदान दिले.

गडकरींनी शरद जोशींच्या एका विधानाचा उल्लेख करत म्हटले, की सहकारातील यश हे केवळ चळवळीचे नाही, तर त्याचे नेतृत्व करणाऱ्यांचे यश असते. आपल्या भाषणात गडकरींनी आधुनिकता आणि वेस्टर्न बनावट यातील फरक स्पष्ट केला. त्यांनी एका घटनेचा हवाला दिला, जिथे एका विदेशी पत्रकाराने त्यांना कामाबद्दल विचारले आणि त्यांनी हा देश आपला आहे अशी भूमिका मांडली. मर्सिडीज मधून आलेल्या ग्राहकाला पटकन कर्ज मिळते, हा मार्मिक टोला त्यांनी पारंपरिक बँकिंग मानसिकतेला लगावला. बँकेने आधुनिकीकरण करतानाही नम्रता आणि सहजता जपल्याबद्दल गडकरींनी समाधान व्यक्त केले. त्यांनी बँकेच्या प्रगतीसाठी शुभेच्छा दिल्या.