Pravin Darekar On Ramdas Kadam : तुम्ही आरे केलं तर, आम्ही पण कारे करू….; प्रवीण दरेकरांचा रामदास कदमांना सूचक इशारा

मनोज जरांगे-पाटील यांच्या कथित ऑडिओ क्लिपमुळे महाराष्ट्राच्या राजकारणात सध्या तीव्र घडामोडी सुरू आहेत. या पार्श्वभूमीवर, शिवसेना (शिंदे गट) नेते रामदास कदम यांनी भाजपवर गंभीर आरोप केले आहेत. एकनाथ शिंदे यांना मुख्यमंत्री करण्यासाठी भाजपने जरांगे-पाटील यांना कथितरीत्या सुपारी दिल्याचा दावा कदम यांनी केला आहे. या आरोपानंतर भाजपमध्ये तीव्र प्रतिक्रिया उमटल्या आहेत.

भाजप नेते प्रवीण दरेकर यांनी रामदास कदम यांच्या आरोपांना जोरदार प्रत्युत्तर दिले आहे. दरेकर यांनी म्हटले आहे की, एकनाथ शिंदे मुख्यमंत्री व्हावेत अशी इच्छा असणे स्वाभाविक आहे. मात्र, महायुतीमध्ये राहून आपल्याच सहकारी पक्षावर आणि नेत्यांवर टीका करणे योग्य नाही. रामदास कदमांना भाजपवर काहीही बोलून आम्ही ऐकून घेऊ असा भ्रम असल्यास तो चुकीचा आहे, असा स्पष्ट इशारा दरेकर यांनी दिला.

तुम्ही ज्येष्ठ आहात म्हणून शिंदे साहेब तुमचा सन्मान करतात, पण जर तुम्ही भाजपला किंवा देवेंद्र फडणवीस यांना बदनाम करण्याचा प्रयत्न केलात तर ते सहन केले जाणार नाही, असे दरेकर यांनी बजावले आहे. जर रामदास कदम यांनी शिंदे साहेब आणि त्यांच्या मुलाबद्दल मागे केलेल्या वक्तव्याच्या क्लिप उघड केल्या, तर त्यांना त्यांची जागा निश्चित कळेल, असा गर्भित इशाराही दरेकर यांनी दिला आहे. यामुळे महायुतीतील अंतर्गत धुसफूस आता समोर आली आहे.