AQI
TV9 Network
User
Sign In

By signing in or creating an account, you agree with Associated Broadcasting Company's Terms & Conditions and Privacy Policy.

Raigad : चार तास वाहतूक कोंडीत रुग्णवाहिका अडकली; दीड वर्षांच्या मुलाचं जीवन संपलं, रायगडमधील घटनेने हळहळ

Raigad : चार तास वाहतूक कोंडीत रुग्णवाहिका अडकली; दीड वर्षांच्या मुलाचं जीवन संपलं, रायगडमधील घटनेने हळहळ

| Updated on: Nov 18, 2026 | 7:39 PM
Share

रायगडमध्ये वाहतूक कोंडीमुळे एका दीड वर्षाच्या चिमुकल्याचा दुर्दैवी मृत्यू झाला आहे. फुगा गिळल्याने प्रकृती गंभीर झालेल्या बाळाला घेऊन रुग्णवाहिका तब्बल चार तास वाहतूक कोंडीत अडकली. वेळेवर उपचार न मिळाल्याने चिमुकल्याने प्राण गमावले. या घटनेमुळे वाहतूक नियोजन आणि आपत्कालीन व्यवस्थेवर प्रश्नचिन्ह निर्माण झाले आहे.

रायगड जिल्ह्यातून एक अत्यंत दुर्दैवी आणि हृदय पिळवटून टाकणारी घटना समोर आली आहे, ज्यामुळे प्रशासनाच्या वाहतूक नियोजनावर आणि आपत्कालीन सेवांच्या तत्परतेवर गंभीर प्रश्नचिन्ह निर्माण झाले आहे. वाहतूक कोंडीमुळे वेळेवर रुग्णालयात पोहोचता न आल्याने एका दीड वर्षाच्या चिमुकल्याचा करुण अंत झाला आहे. चिमुकल्याला घेऊन निघालेली रुग्णवाहिका तब्बल चार तास रस्त्यातच अडकल्यामुळे उपचाराअभावी त्याने आपले प्राण गमावले.

ही घटना दीड वर्षांच्या आरांश नावाच्या मुलासोबत घडली. आरांशच्या आईने टीव्ही ९ मराठीला दिलेल्या माहितीनुसार, दुपारी दोन ते अडीचच्या सुमारास आरांश खेळत होता. खेळता खेळता तो पडला आणि त्याच्या डोक्याला दुखापत झाली. याच दरम्यान त्याने फुगा गिळल्याने त्याची प्रकृती अधिकच गंभीर झाली. घाबरलेल्या आईने तातडीने मदतीसाठी आजूबाजूच्या लोकांना हाक मारली. एका गाडीवाल्याच्या मदतीने त्या जवळच्या रुग्णालयात पोहोचल्या. मात्र, तिथे डॉक्टर उपलब्ध नसल्याने त्यांना पुढील उपचारांसाठी अलिबागला जाण्याचा सल्ला देण्यात आला.

सतीश भगत यांच्या गाडीतून आरांशला घेऊन अलिबागच्या दिशेने जात असतानाच वाटेत एका हॉटेलजवळ त्यांना मोठ्या वाहतूक कोंडीचा सामना करावा लागला. “मी अर्धा ते पाऊण तास गाडीवरच होते. मला कोणी साईड म्हणजे जायला रस्ताच नाही दिली,” असे आरांशच्या आईने वेदनेने सांगितले. रस्त्यावरच्या अडथळ्यांमुळे आणि बेशिस्त वाहतुकीमुळे रुग्णवाहिकेला पुढे सरकणे अशक्य झाले. चार तास वाहतूक कोंडीत अडकल्याने आरांशला वेळेवर उपचार मिळू शकले नाहीत, आणि त्याने अखेरीस आपले प्राण सोडले.

या दुर्दैवी घटनेनंतर आरांशच्या आई-वडिलांनी प्रशासनावर गंभीर आरोप केले आहेत. “जर ही वाहतूक कोंडी नसती तर आम्ही लवकर पोहोचलो असतो आणि माझ्या आरांशचा जीव वाचला असता. ट्रॅफिकमुळेच आमचा… आमच्या मुलाला पोहोचू शकला नाही. ही दुर्दैवी गोष्ट आहे. जर ती ट्रॅफिक क्लिअर असती आणि जर त्याला वेळ मिळाला असता तर एखाद्यावेळी आमचा मुलगा वाचू शकला असता,” असे आरांशच्या आईने भरल्या डोळ्यांनी सांगितले.

या घटनेमुळे रस्त्याच्या कामांचे नियोजन आणि आपत्कालीन वाहतुकीच्या व्यवस्थेवर गंभीर प्रश्न उपस्थित झाले आहेत. रुग्णवाहिकांसारख्या आपत्कालीन वाहनांना त्वरित मार्ग देण्यासाठी कोणतीही प्रभावी यंत्रणा नसल्याचे या घटनेतून समोर आले आहे. प्रशासनाने तातडीने यावर उपाययोजना करून भविष्यात अशा घटना टाळण्यासाठी पावले उचलावीत, अशी मागणी आता सर्वसामान्यांकडून होत आहे.

 

 

Published on: Nov 18, 2026 07:39 PM

Follow Us