2029 साठी आतापासूनच संघटना बांधणीची गरज! बैठकीत राज ठाकरेंनी दिले महत्वाचे आदेश

महाराष्ट्र नवनिर्माण सेनेचे (मनसे) अध्यक्ष राज ठाकरे यांनी २०२९ मध्ये होणाऱ्या विधानसभा निवडणुकांसाठी आतापासूनच संघटना बांधणी करण्याची गरज व्यक्त केली आहे. त्यांनी मुंबई अध्यक्ष आणि उपाध्यक्षांना तातडीने पदाधिकाऱ्यांचे संख्याबळ, महिला आणि तरुण कार्यकर्त्यांबाबत माहिती गोळा करण्याचे निर्देश दिले आहेत. तसेच, रिक्त जागा आणि पदाधिकाऱ्यांच्या कार्यप्रणालीची माहिती घेण्यास सांगितले आहे.

याचबरोबर, मुंबई महापौर पदाच्या निवडणुकीसाठी कोणाला पाठिंबा द्यायचा, यावर मनसे लवकरच आपली भूमिका जाहीर करेल. दुसरीकडे, शिवसेना (उद्धव बाळासाहेब ठाकरे) पक्ष मुंबई महापौर आणि उपमहापौर पदासाठी उमेदवार देण्याची शक्यता आहे. सूत्रांनुसार, ही निवडणूक बिनविरोध होऊ नये, यासाठी ठाकरे सेना उमेदवार देणार आहे. या संदर्भात मातोश्रीवर बैठका सुरू असून, ७ फेब्रुवारी रोजी उमेदवारी अर्ज भरण्याची अंतिम मुदत आहे, तर ११ फेब्रुवारी रोजी निवडणूक होईल. भाजपने मुंबईचे अस्तित्व आणि अस्मिता संपवल्याची टीकाही ठाकरे सेनेच्या नेत्याने केली आहे.