Ravindra Dhangekar : भाजपविरोधी भूमिकेनंतर धंगेकरांकडून ट्वीटरवरील शिवसेनेचा फोटो रिमूव्ह, कारण नेमकं काय?

पुण्यातील आमदार रवींद्र धंगेकर यांनी आपल्या अधिकृत ट्विटर हँडलवर महत्त्वपूर्ण बदल केले आहेत. त्यांनी शिवसेनेचा लोगो हटवून त्याजागी सत्यमेव जयते, पुणेकर फर्स्ट असा फोटो लावला आहे. या बदलाने राजकीय वर्तुळात अनेक तर्कवितर्क सुरू झाले आहेत. धंगेकर यांनी यापूर्वी भाजपविरोधात नव्हे, तर विकृतीविरोधात बोललो असल्याचे म्हटले होते आणि नोटीस किंवा हकालपट्टीची शक्यता वाटत नसल्याचेही ते म्हणाले होते. मात्र, दुसरीकडे त्यांनी ट्विटरवरील शिवसेनेचा फोटो हटवून आपली भूमिका स्पष्ट केली आहे.

गेल्या काही काळापासून रवींद्र धंगेकर हे भाजपचे नेते चंद्रकांत पाटील आणि मुरलीधर मोहोळ यांच्या विरोधात आक्रमक भूमिका घेताना दिसत आहेत. निलेश घायवळ प्रकरण आणि जैन बोर्डिंग जमीन प्रकरण यांसारख्या मुद्द्यांवरून त्यांनी भाजप नेत्यांवर टीका केली होती. या पार्श्वभूमीवर भाजप नेत्यांनी त्यांची तक्रार मुख्यमंत्री देवेंद्र फडणवीस यांच्याकडे देखील केली आहे. धंगेकर यांनी मी पुणेकर म्हणून लढतोय, कुठल्याही राजकीय किमतीला सामोरे जाण्यास तयार आहे अशी प्रतिक्रिया दिली आहे.