…तरच राष्ट्रवादीचं विलिनीकरण शक्य; त्या एका अटीबाबत रोहित पवारांची मोठी प्रतिक्रिया

राष्ट्रवादी शरदचंद्र पवार पक्षाचे आमदार रोहित पवार यांनी दोन राष्ट्रवादी काँग्रेस गटांच्या संभाव्य विलीनीकरणावर आपली भूमिका स्पष्ट केली आहे. भाजपची साथ सोडल्यास आणि भाजपविरोधात लढण्याची इच्छा अजित पवार गटाने दर्शवल्यास दोन्ही गट एकत्र येऊन भाजपविरोधात लढू शकतात, ज्यामुळे विलीनीकरण शक्य होईल, असे रोहित पवार यांनी म्हटले. पवार साहेबांनी स्वतः स्पष्ट केले आहे की, राष्ट्रवादी काँग्रेस भाजपसोबत जाणार नाही किंवा काँग्रेससोबत विलीन होणार नाही. आम्ही इंडिया आघाडीसोबत आहोत आणि लोकांचे प्रश्न मांडत राहू, असे त्यांनी नमूद केले.

शरद पवार कधीही भाजपसोबत जाणार नाहीत असा ठाम विश्वास रोहित पवार यांनी व्यक्त केला. आपण लोकांच्या अडचणी समजून घेण्यासाठी आणि त्यावर लढण्यासाठी सातत्याने प्रयत्न करत असल्याचे रोहित पवारांनी सांगितले. मविआ आघाडीतील पक्ष म्हणून काँग्रेस आणि उद्धव ठाकरे गटाच्या शिवसेनेसोबत एकत्रितपणे काम करत राहू, असेही ते म्हणाले. जनतेच्या प्रश्नांवर आक्रमकपणे आवाज उचलत सरकारला गुडघे टेकण्यास भाग पाडण्याचा त्यांचा मानस आहे.