रोहित पवारांना मुख्यमंत्री कार्यालयाचा फोन! नेमकं कारण काय?

आमदार रोहित पवारांना मुख्यमंत्री कार्यालयाकडून फोन आल्याची सूत्रांनी माहिती दिली आहे. रोहित पवारांनी अजित पवारांच्या देवगिरी बंगल्यावर स्मारक करण्याची मागणी केली होती. याच अनुषंगाने, बजेटमध्ये स्मारकासाठी तरतूद करण्याच्या चर्चेसाठी मुख्यमंत्री कार्यालयातून हा फोन आल्याचे समजते.

दुसरीकडे, रोहित पवार अजित पवारांच्या विमान अपघाताच्या चौकशीसंदर्भात आक्रमक भूमिका घेत आहेत. मुंबई पोलिसांनी गुन्हा दाखल करून घेण्यास नकार दिल्यानंतर, आज रोहित पवार युगेंद्र पवार यांच्यासोबत बारामती पोलिस ठाण्यात डीजीसीए आणि व्हीएसआर विरोधात तक्रार दाखल करण्यासाठी पोहोचले. त्यांच्यासोबत मोठ्या संख्येने अजित पवारांचे समर्थक उपस्थित होते, जे बारामती एकत्र आहे, सत्यासाठी न्यायासाठी असे फलक घेऊन आले होते.

रोहित पवारांचे वडील राजेंद्र पवार यांनीही बारामती पोलिस ठाण्यात उपस्थित राहून आपली भूमिका मांडली. अधिवेशनात यावर चर्चा होत नसेल तर समजून जायला हवे, असे सूचक विधान त्यांनी केले. या प्रकरणातील सत्य समोर यावे आणि दादांना न्याय मिळावा, अशी मागणी बारामतीकरांकडून होत आहे. गुन्हा दाखल न झाल्यास तीव्र आंदोलनाचा इशाराही समर्थकांनी दिला आहे.