MPSC विद्यार्थ्यांच्या 11 दिवसांच्या आंदोलनाला यश; रोहित पवार म्हणाले, हा युवा पिढीच्या…

एमपीएससी विद्यार्थ्यांचा सत्याग्रह अखेर यशस्वी झाला असून, यावर राष्ट्रवादी काँग्रेसचे नेते रोहित पवारांनी आपली प्रतिक्रिया दिली आहे. विद्यार्थ्यांच्या जिद्दीचा, चिकाटीचा आणि एकजुटीचा हा विजय असल्याचे त्यांनी म्हटले आहे. तब्बल ११ दिवस सुरू असलेल्या आंदोलनानंतर सरकारने विद्यार्थ्यांच्या मागण्या मान्य केल्याबद्दल पवार यांनी समाधान व्यक्त केले. “उशीर झाला असला तरी मागण्या मान्य होणं महत्त्वाचं आहे,” असे ते म्हणाले.

या यशाचे श्रेय सामान्य कुटुंबातील युवा पिढीच्या एकजुटीला देत, रोहित पवारांनी आंदोलनकर्ते, उपोषणकर्ते आणि मदत करणाऱ्या सर्वांचे आभार मानले. अन्याय होत असताना एकजूट दाखवल्यास विजय निश्चित मिळतो, हे या घटनेतून सिद्ध झाल्याचे त्यांनी अधोरेखित केले. भिमनवार यांच्या राजीनाम्याची मागणी पूर्ण झाली नसली तरी, त्यांना सक्तीच्या रजेवर पाठवून आयोगाच्या शुद्धीकरणासाठी पाऊल उचलण्यात आले आहे. ६० दिवसांत कारवाई न झाल्यास पुढील भूमिका घेण्याचा इशाराही पवारांनी दिला.