Sachin Waze : साडेपाच वर्षांनी सचिन वाझेला जामीन! अँटिलिया प्रकरणानंतर आता दिशा सालियन प्रकरणावरही वाझेंचं मोठं वक्तव्य; म्हणाले…

मुंबईतील बहुचर्चित अँटेलिया स्फोटक प्रकरणात साडेपाच वर्षांनंतर माजी पोलीस अधिकारी सचिन वाझेला जामीन मंजूर झाला आहे. मुंबई उच्च न्यायालयाने राष्ट्रीय तपास यंत्रणेने (एनआयए) जामीन स्थगित करण्याची केलेली मागणी फेटाळून लावली आहे. तरीही एनआयएने या निर्णयाविरोधात सर्वोच्च न्यायालयात याचिका दाखल केली असून त्यावर आज सुनावणी होणार आहे. त्यामुळे वाझेच्या जामीन आदेशाला स्थगिती मिळते की नाही, याकडे सर्वांचे लक्ष लागले आहे.

दरम्यान, दिशा सालियान मृत्यू प्रकरणात सचिन वाझेने आपली भूमिका पहिल्यांदाच स्पष्ट केली आहे. “दिशाच्या प्रकरणात माझं नाव जाणीवपूर्वक घेऊन बदनामी सुरू आहे,” असे वाझेने म्हटले आहे. त्याने एनआयए न्यायालयात या संदर्भात अर्जही केला आहे. तसेच, दिशाच्या वकिलांनी वाझे माफीचा साक्षीदार होणार असल्याचा केलेला दावा खोटा असल्याचे वाझेने ठामपणे सांगितले आहे.

न्यायालयाने जामीन मंजूर करताना सचिन वाझेला काही अटी घातल्या आहेत. यानुसार, त्याला मुंबई, नवी मुंबई, रायगड, ठाणे आणि पालघर या पाच जिल्ह्यांमध्ये वास्तव्य करण्यास प्रतिबंध घालण्यात आला आहे. त्यामुळे, सचिन वाझे आता पुणे येथे वास्तव्य करणार असल्याची माहिती त्याने न्यायालयाला दिली आहे. या घडामोडींमुळे दोन्ही प्रकरणांतील पुढील कायदेशीर प्रक्रिया अधिक वेगवान होण्याची शक्यता आहे.