संभाजीनगरमध्ये परीक्षा केंद्रावर शिक्षकाचं विद्यार्थिनीशी गैरवर्तन! व्हिडीओ व्हायरल

छत्रपती संभाजीनगरमधील बजाज नगर येथील एका परीक्षा केंद्रावर शिक्षकाने विद्यार्थिनीशी गैरवर्तन केल्याचा धक्कादायक प्रकार समोर आला आहे. या शिक्षकाने विद्यार्थिनीचा मोबाईल नंबर मिळवून तिला वारंवार फोन करून त्रास दिल्याचा आरोप आहे. या प्रकारामुळे विद्यार्थिनीच्या नातेवाईकांना प्रचंड राग अनावर झाला.

घडलेला प्रकार समोर येताच संतप्त नातेवाईकांनी परीक्षा केंद्रावर धाव घेतली आणि त्या शिक्षकाला चांगलाच चोप दिला. या मारहाणीचा एक व्हिडीओ समाज माध्यमांवर वेगाने व्हायरल होत आहे. व्हायरल झालेल्या व्हिडीओमध्ये नातेवाईक शिक्षकाला त्याच्या गैरवर्तनाबद्दल जाब विचारताना दिसत आहेत. “तू कोण आहे? शिक्षक. तू कसकाय नंबर दिला? नंबर घ्यायचा काय उद्देश आहे तुझा?” असे प्रश्न विचारत नातेवाईकांनी शिक्षकाची कानउघाडणी केली. शिक्षकाने माफी मागितली असली तरी नातेवाईकांचा संताप शांत झाला नाही. या घटनेमुळे परीक्षा केंद्रांवरील सुरक्षेचा आणि शिक्षकांच्या वर्तनाचा प्रश्न पुन्हा एकदा ऐरणीवर आला आहे. प्रशासनाने या घटनेची गंभीर दखल घेऊन योग्य ती कारवाई करावी अशी मागणी स्थानिकांकडून होत आहे.