ते आमिष दाखवून फोडाफोडी करतात! संदीप देशपांडेंची भाजपवर टीका

महाराष्ट्र नवनिर्माण सेनेचे नेते संदीप देशपांडे यांनी भाजप आणि शिंदे गटावर जोरदार टीका केली आहे. स्थानिक स्वराज्य संस्थांच्या निवडणुकांच्या पार्श्वभूमीवर सुरू असलेल्या राजकीय घडामोडींवर बोलताना, त्यांनी हे सर्व नाटक असल्याचा दावा केला. विरोधकांची जागा (स्पेस) खाण्यासाठी शिवसेना (शिंदे गट) आणि भाजप हे भांडणाचे नाटक करत असल्याचे देशपांडे यांनी म्हटले आहे.

मनसेच्या कार्यकर्त्यांना आमिष दाखवून फोडण्याचे प्रयत्न सुरू असल्याचा आरोप त्यांनी केला. मात्र, महाराष्ट्र नवनिर्माण सेना याला घाबरत नाही आणि त्यांचे कार्यकर्ते एकनिष्ठ आहेत, असे त्यांनी स्पष्ट केले. डोंबिवलीमध्ये मनसेतून काही जण भाजपमध्ये जात असल्याच्या प्रश्नावर बोलताना, मनसेची ताकद कोण नेता नसून महाराष्ट्र सैनिक असल्याचे देशपांडे यांनी सांगितले. तसेच, स्थानिक स्वराज्य संस्थांच्या निवडणुकांमध्ये मायलेज घेण्यासाठी भाजप आणि शिंदे गट एकत्रितपणे डाव खेळत असल्याचा आरोपही त्यांनी केला.