मंत्र्याच्या जावयाला… भ्रष्टाचाराचं ‘जामनेर पॅटर्न’; नाशिकसह महाराष्ट्रभरात… बड्या नेत्याच्या विधानाने खळबळ

शिवसेना नेते संजय राऊत यांनी सामना वृत्तपत्रातून मंत्री महाजन आणि सामंत यांच्यावर भ्रष्टाचाराचा गंभीर आरोप केला आहे. जामनेर पॅटर्न असे संबोधत, महाराष्ट्राला लुटले जात असल्याचा दावा त्यांनी केला आहे. राऊतांच्या मते, विविध व्यवहारांमध्ये मंत्र्यांच्या जावयांना 27 ते 28 कोटी रुपये कमिशन म्हणून मिळाले आहेत.

स्मार्ट सिटीच्या एका निविदेचे उदाहरण देताना, 71 कोटींचे काम रेल टेल कंपनीने मिळवले, ते पुढे 54 कोटींना नेमस्टरला, तर नेमस्टरने ते 44 कोटींना श्री कंबाइनला दिले. या व्यवहारातील 27-28 कोटींची रक्कम संबंधित मंत्र्यांच्या जावयांना मिळाली असल्याचा आरोप राऊतांनी केला आहे. यामुळे नाशिक महापालिकेची मोठी फसवणूक झाल्याचे त्यांचे म्हणणे आहे. याव्यतिरिक्त, एमआयडीसीमध्ये भूखंड विक्रीचे घृणास्पद व्यवहार सुरू असल्याचा आरोपही त्यांनी केला आहे.

मराठी उद्योजकांना डावलून नियमबाह्य पद्धतीने भूखंड विकले जात आहेत. शिर्डीतील एका मराठी उद्योजकाला प्लॉट मिळावा यासाठी पात्र असूनही डावलले गेले, कारण एजंटने जागेच्या किंमती इतकीच लाच मागितली. या प्रकारामुळे महाराष्ट्रात भ्रष्टाचाराचे गंभीर आरोप पुन्हा ऐरणीवर आले आहेत.