शंभूराज देसाईंकडून दिवाळीनिमित्त साताऱ्यात पायी दौरा

पालकमंत्री शंभूराज देसाई यांनी दिवाळीच्या पार्श्वभूमीवर सातारा शहराला अचानक भेट दिली. शहराच्या मुख्य बाजारपेठांमध्ये पायी फिरून त्यांनी परिस्थितीची पाहणी केली. मोती चौक, खणआळी आणि इतर प्रमुख बाजारपेठांमध्ये दिवाळीनिमित्त खरेदीसाठी नागरिकांची मोठी गर्दी दिसून आली.

यावेळी देसाईंनी एका महिलेला दिवाळीच्या शुभेच्छा इंग्रजीऐवजी मराठीत देण्याचा सल्ला दिला. विशेषतः दिवाळीच्या दोन-तीन दिवस आधीपासून बाजारपेठांमध्ये मोठ्या प्रमाणावर गर्दी असते. त्यामुळे ग्राहकांना खरेदी करताना कोणत्याही प्रकारचा त्रास होऊ नये, यासाठी त्यांनी अगोदरच नगरपालिका प्रशासन आणि पोलीस प्रशासनाला वाहतूक तसेच गर्दीच्या नियोजनाबाबत कठोर आदेश दिले होते. या आदेशांची अंमलबजावणी योग्य प्रकारे होत आहे की नाही, याची खात्री करण्यासाठीच त्यांनी हा दौरा केला. प्रशासनाने केलेल्या गर्दीच्या नियोजनामुळे शहरातील खरेदी प्रक्रिया सुलभ आणि सुकर झाल्याचे त्यांनी नमूद केले. नागरिकांना शांततेत आणि सुरक्षितपणे दिवाळीची खरेदी करता यावी, यासाठी प्रशासकीय यंत्रणा सतर्क असल्याचे या दौऱ्यातून स्पष्ट झाले.