Uttam Jankar : निवडणूक आयोग झोकांड्या खातोय की…, गंभीर आरोप करत जानकर यांचं निवडणूक प्रक्रियेवर प्रश्नचिन्ह

शरद पवार गट आमदार उत्तम जानकर यांनी महाराष्ट्रातील स्थानिक स्वराज्य संस्थांच्या निवडणुकांच्या प्रक्रियेवरून निवडणूक आयोगावर तीव्र शब्दांत टीका केली आहे. निवडणूक आयोगाला काय करावे हे समजत नाही, असा आरोप त्यांनी केला. सोलापूर जिल्ह्यातील निवडणुकांमध्ये पुरुषांना उमेदवारीपासून वंचित ठेवण्यात आले आणि केवळ भारतीय जनता पक्षाचेच नगराध्यक्ष असावेत असा दबाव आणला गेला, असा दावा जानकर यांनी केला. क्यूआरटी पथकाच्या माध्यमातून महिलांना अर्ज भरण्यासाठी नेण्यात आल्याचेही त्यांनी नमूद केले.

जानकर यांच्या म्हणण्यानुसार, निवडणुकीमध्ये पैशांचे वाटप पोलिसांच्या गाड्यांमधून होत होते आणि निवडणूक निर्णय अधिकारी दबावाखाली निर्णय देत होते. या प्रकारामुळे राज्यभरात ईव्हीएम फोडल्याच्या घटना घडल्या. लोकशाही धोक्यात असून, भविष्यात राजेशाही आणि हुकूमशाही एकत्र येण्याची भीती जनतेच्या मनात निर्माण झाली आहे, असे जानकर यांनी म्हटले. त्यांनी राज्य सरकार आणि निवडणूक आयोगाला लोकशाही जिवंत ठेवण्याचे आवाहन केले आहे.