Shivsena : पुणे शिक्षक मतदारसंघात शिंदे गटाची भाजपला धक्का देणारी खेळी; नेमकं काय घडतंय? 

पुणे शिक्षक मतदार संघातून शिंदे गटाच्या शिवसेनेने अपक्ष उमेदवार सचिन सानप यांना पाठिंबा दिल्याची माहिती समोर आली आहे. या मतदारसंघात भाजपने कौस्तुभ गावडे यांना उमेदवारी दिली असताना, शिंदे गटाचा हा निर्णय राजकीय वर्तुळात चर्चेचा विषय बनला आहे. सुरुवातीला शिंदे गटाकडून इच्छूक असलेले मंगेश चिवटे यांनी पक्षश्रेष्ठींच्या आदेशानुसार उमेदवारी अर्ज मागे घेतला होता.

नंदनवन येथे झालेल्या एका बैठकीत मंत्री शंभूराज देसाई, मंत्री उदय सामंत यांच्यासह पश्चिम महाराष्ट्रातील नेते उपस्थित होते. या बैठकीतच सचिन सानप यांना पाठिंबा देण्यावर चर्चा झाल्याचे सूत्रांचे म्हणणे आहे. मात्र, मंत्री उदय सामंत यांनी या चर्चा फेटाळत, कोणताही अंतिम निर्णय झाला नसल्याचे म्हटले आहे. मुख्यमंत्री एकनाथ शिंदे हे शिक्षकांच्या प्रश्नांबाबत सकारात्मक असल्याने, त्यांचा आशीर्वाद मिळेल, अशी आशा सानप यांनी व्यक्त केली आहे. पुणे आणि अमरावती शिक्षक मतदारसंघावरून शिंदे नाराज असल्याचीही चर्चा आहे.