शिवसेना कुणाची? धनुष्यबाण कुणाचा? निकालाआधी राऊतांचं मोठं विधान; म्हणाले…

शिवसेना पक्ष आणि धनुष्यबाण चिन्ह कोणाचे, या बहुचर्चित वादावर सर्वोच्च न्यायालयात सुरू असलेली सुनावणी आता अंतिम टप्प्यात पोहोचली आहे. काल या प्रकरणावर जोरदार युक्तिवाद झाला असून, आज दुपारी पुन्हा सुनावणी होण्याची शक्यता आहे. याच पार्श्वभूमीवर खासदार संजय राऊत यांनी पत्रकार परिषदेत शिंदे गट आणि उपमुख्यमंत्री एकनाथ शिंदे यांच्यावर जोरदार निशाणा साधला.

सर्वोच्च न्यायालयातील आतापर्यंतच्या सुनावणीवर आपण समाधानी असल्याचे संजय राऊत यांनी सांगितले. न्यायालय आपली बाजू ऐकून घेत असून, आपल्याला कोणतीही विशेष सवलत किंवा फेवर नको, तर केवळ योग्य न्याय हवा असल्याचे त्यांनी स्पष्ट केले. शिवसेनेची 2018 मधील पक्षघटना अलोकतांत्रिक होती, हा दावा आपण मान्य करत नसल्याचेही राऊत यांनी सांगितले.

“आमची घटना अलोकतांत्रिक होती, असं आम्ही मान्य करत नाही. जर ती अलोकतांत्रिक होती, तर तिची मान्यता रद्द करायला हवी होती. मग शिवसेना पक्ष अलोकतांत्रिक असल्याचा दावा करत शिंदे यांच्या हातात पक्ष कसा देण्यात आला?” असा सवाल संजय राऊत यांनी उपस्थित केला.

धनुष्यबाण चिन्हाच्या निर्णयाबाबत बोलताना राऊत यांनी निवडणूक आयोगाच्या भूमिकेवरही गंभीर आरोप केले. पक्ष आणि चिन्ह चुकीच्या व्यक्तींच्या हातात गेले असल्याचा दावा करत त्यांनी न्यायालयाकडून ते परत मिळण्याची अपेक्षा व्यक्त केली. “चुकीच्या माणसांच्या हातात सेनेचं चिन्ह गेलं आहे, ते अगोदर काढून घ्या,” अशी मागणी त्यांनी केली.

निवडणूक आयोगाच्या निर्णयावर टीका करताना राऊत यांनी “चोरी झाली आणि त्यात निवडणूक आयोगही सामील झाला,” असा गंभीर आरोप केला. आपला मुद्देमाल आपल्याला परत मिळावा, अशी भूमिका त्यांनी मांडली. पक्ष आणि चिन्हाबाबत अंतिम निर्णय सर्वोच्च न्यायालय घेणार असल्याचेही त्यांनी स्पष्ट केले.

दरम्यान, खासदार नरेश म्हस्के यांच्यावरही संजय राऊत यांनी भाष्य केले. नरेश म्हस्के हे पूर्वी उद्धव ठाकरे गटासोबत होते आणि एकनाथ शिंदे यांच्याविरोधात तक्रारी करण्यात ते आघाडीवर असल्याचा दावा राऊत यांनी केला. यासंदर्भातील त्यांची पूर्वीची पत्रेही समोर आल्याचे त्यांनी सांगितले.

दरम्यान, गडचिरोलीतील आश्रमशाळेत सर्पदंशामुळे विद्यार्थ्यांचा मृत्यू झाल्याच्या घटनेवरूनही संजय राऊत यांनी सरकार आणि आदिवासी विभागाच्या कार्यपद्धतीवर प्रश्न उपस्थित केले. विद्यार्थ्यांच्या सुरक्षेचा मुद्दा गंभीर असून, अशा घटनांबाबत प्रशासनाने जबाबदारी निश्चित करण्याची गरज असल्याचे त्यांनी म्हटले.

शिवसेना पक्ष, धनुष्यबाण चिन्ह आणि निवडणूक आयोगाच्या निर्णयावरील सर्वोच्च न्यायालयातील सुनावणी निर्णायक टप्प्यात पोहोचली असताना संजय राऊत यांच्या या वक्तव्यामुळे महाराष्ट्राच्या राजकीय वर्तुळात पुन्हा चर्चांना उधाण आले आहे. आता सर्वोच्च न्यायालय या प्रकरणात काय भूमिका घेते आणि शिवसेना पक्ष व धनुष्यबाण चिन्हाबाबत अंतिम निर्णय काय होतो, याकडे सर्वांचे लक्ष लागले आहे.