सोलापुरात अवकाळीचा फटका: टोमॅटो, ज्वारी, गहूसह अनेक पिके उद्ध्वस्त

सोलापूर जिल्ह्याच्या दक्षिण सोलापूर तालुक्यात अवकाळी पाऊस आणि वादळी वाऱ्यामुळे शेती पिकांना मोठा फटका बसला आहे. मंद्रूप परिसरातील शेतकऱ्यांच्या हाता-तोंडाशी आलेली टोमॅटोची बाग पूर्णपणे झोपली असून, गहू, ज्वारी आणि हरभरा यांसारखी पिकेही भुईसपाट झाली आहेत.

शेतकऱ्यांनी मोठ्या कष्टाने आणि हजारो रुपये खर्च करून ही पिके पिकवली होती. एका टोमॅटो बागेसाठी ३० ते ४० हजार रुपये खर्चून दीड ते दोन लाख रुपयांच्या उत्पन्नाची अपेक्षा होती, ती आता पूर्णपणे नष्ट झाली आहे. शेतकऱ्यांच्या मते, गेल्या खरीप हंगामातही त्यांना नुकसान झाले होते आणि आता रब्बीची पिकेही अवकाळी पावसाने हिरावून घेतली आहेत.

या गंभीर परिस्थितीमुळे शेतकरी मोठ्या आर्थिक संकटात सापडले आहेत. त्यांनी शासनाकडे तातडीने पंचनामे करून भरीव आर्थिक मदतीची मागणी केली आहे, जेणेकरून त्यांना या नुकसानीतून बाहेर पडता येईल.