Solapur Flood : सीना नदीच्या पुरानं बळीराजा उद्ध्वस्त, पिकाचं नुकसान अन् शेतकरी हवालदिल

सोलापूर जिल्ह्यातील करमाळा तालुक्यातील खडकी येथे सीना नदीला आलेल्या पुरामुळे नदीकाठच्या शेतकऱ्यांचे मोठे नुकसान झाले आहे. अनेक ठिकाणी मका पिके पूर्णपणे पाण्याखाली गेली आहेत. अजूनही शेतात गुडघाभर पाणी साचलेले दिसून येत आहे. पाण्याच्या जोरदार प्रवाहामुळे मका पिके झोपून गेल्याचे चित्र आहे, ज्यामुळे मोठ्या प्रमाणात नुकसान झाले आहे. या पुरामुळे दोन एकर मका पूर्णपणे नष्ट झाली आहे, जी आठ ते दहा दिवसांत काढणीसाठी तयार होती.

तसेच, १६ ते १७ एकर ऊस पीकही पूर्णपणे पाण्याखाली जाऊन त्याचे वाढ खुंटले आहे, त्यामुळे ते सडून जाण्याची भीती आहे. शेतकऱ्यांनी सरकारकडे मदतीची मागणी केली असून, उसासाठी एकरी दोन लाख रुपये आणि मक्यासाठी दोन एकरला एक लाख रुपये नुकसानभरपाई मिळावी अशी त्यांची विनंती आहे.