छत्रपती संभाजीनगराचे नाव पुन्हा औरंगाबादच करावे; बड्या नेत्याच्या विधानाने खळबळ, मनसे आक्रमक

महाराष्ट्राच्या राजकारणात शहरांच्या नामांतराचा मुद्दा पुन्हा एकदा चर्चेत आला आहे. संभाजीनगरचे नाव औरंगाबादच राहावे, अशी भूमिका वंचित बहुजन आघाडीचे नेते सुजात आंबेडकर यांनी मांडली आहे. त्याचबरोबर, त्यांनी एक नवीन मागणी केली आहे की पुण्याचे नाव छत्रपती संभाजीनगर करावे. पुण्याशी आपला वैयक्तिक संबंध स्पष्ट करताना सुजात आंबेडकर म्हणाले, “माझे शिक्षण पुण्यातले आहे, माझा जन्म पुण्यातला आहे. थर्ड इयरपर्यंतचे पदवी शिक्षण माझे पुण्यातूनच झाले आहे.” याच आधारावर, त्यांनी पुण्याला छत्रपती संभाजी महाराजांचे नाव देण्याची मागणी केली.

मात्र, त्यांनी एक प्रश्नही उपस्थित केला की छत्रपती संभाजी महाराजांचे नाव पुण्यातल्याच ब्राह्मणांना चालणार आहे का. या मागणीवर महाराष्ट्र नवनिर्माण सेनेचे नेते संदीप देशपांडे यांनी प्रतिक्रिया दिली आहे. सुजात आंबेडकरांचे हे वक्तव्य केवळ प्रसिद्धी मिळवण्यासाठी असल्याचे संदीप देशपांडे यांनी म्हटले आहे. या प्रकारची वक्तव्ये प्रसिद्धीसाठी केली जातात आणि त्यावर अनावश्यक चर्चा करण्याची गरज नाही, असेही त्यांनी नमूद केले. या भिन्न मतांमुळे महाराष्ट्राच्या राजकारणात शहरांच्या नामांतराचा मुद्दा पुन्हा एकदा केंद्रस्थानी आला आहे.